<img height="1" width="1" style="display:none" src="https://www.facebook.com/tr?id=1722691227794037&amp;ev=PageView&amp;noscript=1">

Байрны зээл авах талаар таны мэдэх хэрэгтэй бүх зүйл

Байр орон сууц худалдан авах, байрны зээл хөөцөлдөх гэдэг учир нь олдохгүй, цаг хугацаа их шаардсан ажил мэт санагддаг уу? Таныг бичиг баримт хөөцөлдөж, банкны салбарт дахин дахин ирж цаг алдахаас сэргийлэхийн зэрэгцээ зээлийн хүсэлт гаргаснаас хойш болдог бүх процессыг тайлбарлах зорилгоор энэхүү нийтлэлийг бэлтгэлээ.


Харилцааны менежертэй уулзалт хийх


Орон сууцны зээл авах хамгийн эхний алхам бол өөрт ойр байрлах банкны салбарт хандан Харилцааны менежертэй (бидний нэрлэж заншсанаар Зээлийн эдийн засагч) уулзалт хийх юм. Энэ уулзалтын үеэр таныг орон сууцны зээл авахад тавигдах шаардлагуудад хэрхэн нийцэж байгааг дүгнэн, шаардлагатай бичиг баримтыг бүрдүүлэх талаар зөвлөгөө, мэдээллийг өгдөг. Харилцааны менежер таны болон таны хамтран зээлдэгчийн санхүүгийн байдал, орлого зарлагатай танилцан танд ямар хэмжээний зээл гарах боломжтойг судалж өгнө. Та өөрийн авахыг сонирхож буй байрны үнэ, урьдчилгаа төлбөрт хэдэн төгрөг төлөх боломжтой байгаа зэрэг мэдээллээ солилцсоноор Харилцааны менежер танд анхаарах зүйлсийг хэлж өгч, мөн танд ямар боломжууд байгааг танилцуулах болно.


Байр, орон сууцаа сонгох


Харилцааны менежерээс өөрт хэрэгтэй зөвлөгөө, мэдээллийг авсны дараагаар та хэдэн төгрөгийн байр, орон сууц худалдан авах боломжтой, урьдчилгаа төлбөрт хэдийг төлөх шаардлагатай, сар бүрийн тань эргэн төлөлт ойролцоогоор хэдэн төгрөг байх зэрэг талаар тодорхой мэдлэгтэй болсон байна. Үүн дээр үндэслэн та өөрт тохирох байр, орон сууцаа сонгоно. ХААН Банкны орон сууцны зээлийн нөхцөлийн хувьд нийт үнийн дүнгийн 20%-ийг урьдчилгаанд төлсөн байх шаардлагатай ба жилийн хүү нь 15.6-18.6% болж буурсан.


Шаардлагатай бичиг баримтыг бүрдүүлээд, зээлийн хүсэлтээ өгөх


Худалдан авах байр, орон сууцаа эцсийн байдлаар сонгосны дараа та шаардлагатай бичиг баримтуудаа бүрэн гүйцэд бүрдүүлж, урьдчилгаа төлбөрөө байршуулснаар банк таны зээлийн хүсэлтийг хүлээн авна. Зээлийн хүсэлтийг хүлээн авснаас хойш ажлын 1-3 хоногийн дотор шийдвэр гарах боломжтой байдаг буюу зээлийн процесс удах шалтгаан нь шаардлагатай бичиг баримтыг бүрэн гүйцэд бүрдүүлж өгөлгүй удсантай холбоотой юм. Бичиг баримт нь бүрэн гүйцэд байлаа ч ямар нэг тамга, тэмдэг дутуу байх шалтгаанаар буцаагдах тохиолдог гардаг тул та үүн дээр сайтар анхаараарай.


Зээлийн гэрээ байгуулан, орон сууцаа худалдан авах


Зээлийн шийдвэр гарсны дараа Харилцааны менежер тантай холбогдон үл хөдлөх хөрөнгийн гэрчилгээг хэрхэн өөрийн нэр дээр шилжүүлэн авах талаар зөвлөгөө өгнө. Тухайн үл хөдлөх хөрөнгийн гэрчилгээ таны нэр дээр шилжсэний дараа банк тантай зээлийн гэрээг байгуулна. Үүний дараагийн алхам нь үл хөдлөх хөрөнгөө улсын бүртгэлд бүртгүүлэх бөгөөд түүнтэй холбоотой бичиг баримтыг бүрдүүлэхэд Харилцааны менежер танд тусална. Улсын бүртгэлд бүртгэгдсэний дараа таны нийт төлбөр худалдагч талд шилжиж, улмаар та орон сууцандаа орох эрхтэй болно.


Зээл төлөлт


Зээлийн гэрээ байгуулахад Харилцааны менежер танд зээлийн эргэн төлөлтийн графикийг танилцуулна. Таны санхүүгийн тогтвортой байдлыг хангахын тулд банк ихэвчлэн тэнцүү төлөлтийн аргаар таны зээлийн эргэн төлөлтийг хүлээн авна. Энэ нь сар бүр ижил дүнгээр эргэн төлөлт хийнэ гэсэн үг юм. Тэнцүү төлөлтийн графикийн нэг онцлог нь эхэн үед таны үндсэн зээлийн төлөлт арай бага, хүүний төлөлт арай их байх ба зээлийн хугацааны төгсгөл рүү ойртох тусам үндсэн зээлийн төлөлт ихсэж, хүүний төлөлт багасдаг. Зээлийн эргэн төлөлтийг сар бүрийн тогтмол өдөр таны данснаас автоматаар суутгадаг. Хэрэв та хугацаанаас өмнө төлөлт хийсэн тохиолдолд тухайн дүн нь таны үндсэн зээлээс хасагдах буюу таны зээлээ төлдөг өдөр автомат суутгалт хийгдсээр байна гэдгийг санаарай.

 

Орон сууцны зээл татаж авах

МЭДЭЭ МЭДЭЭЛЭЛ